Pinoy Horror Story

Bata pa ako nung nangyari ito. Elementary days pa yun. Batang 80’s ako.

Sa barrio namin sa ilokos ay merong isang pamilya na ang hanapbuhay ay pagiging ahente ng jueteng, magmula sa magulang hanggang sa mga anak nila ay ahente.

Ang barrio namin ay bandang tabi ng dagat. Kung papunta ka ng bayan ay meron din 2km ang layo at puro kabukiran lamang ang makikita. Wala din street lights pa nung panahon na yun. Meron din mangilan-ilang mga puno sa tabi ng kalsada pero isa duon ang kinakatakutan dahil meron daw mga nagpapakitang ibat-ibang klase ng elemento. Hindi ko alam kung anong tawag ng punong iyon sa tagalog pero sa ilokano ay lugo’. Maganda itong lilim sa mga magsasaka dahil parang payong ang sanga nito at malalaki din ang mga dahon. Namulat na ako tungkol sa ibat-ibang kwento ng mga tao saamin tungkol sa mga nagpapakita duon. Salamat sa diyos at wala ako naranasan kahit naglalakad ako nun pauwi saamin ng madaling araw pag nauwi ako galing manila dahil ayaw maghatid ng mga traysikel dun samin dahil sa takot pagbalik sa bayan. Marami na kasi nakakita ng malaking itim na baboy at malaking itim na aso na nakaharang sa kalsada pag pauwi na sila.

Isang gabi bandang alas dose na iyon, nagising ang ilang tao sa sigaw ng isang lalakeng tumatakbo sa barrio namin. Kinaumagahan ay kumalat ang balitang minulto ang isang anak na lalake nung pamilyang ahente ng jueteng. Nagkasakit siya nun sa sobrang gulat at takot sa naranasan niya.

Ayon sa kanya, pauwi na sya nun galing sa bolahan ng jueteng (last ball) nung gabing iyon. Habang sakay niya ang bisikletang luma. Alam niyo ba yung bisikletang luma na malalaki ang gulong tapos may angkasan o upuan sa likod ng drayber? OO yun yon! Mabigat yung bisikletang yun. Klasmeyt ko kasi isang utol nila at halos lahat sila ay tag iisa nun ganun klase ng bisikleta. So habang nasa kalsada (hindi pa sementado nung panahon na yun, kaya medyo mabato at baku-bako) daw sya at palapit na sa punong ito, may naaninag daw siyang tao na nakatayo sa puno. Nung malapitan na daw ay pinara sya nung nakatayong tao. Isang LOLA na medyo kuba na daw sa katandaan. Hinintuan nya daw at nagsalita ang lola kung pwede daw ba sya makisabay kahit ibaba nalang daw sya sa barangay hall dahil papunta daw sya kabilang barangay. Pinasakay nya daw ito sa likuran. Napansin nya daw itong imbes na bumigat ang biskleta nya ay lalo pa itong gumaan na parang nakalutang lamang ito. Hindi nalang daw nya ito pinansin at nagpatuloy lang sa pagpadyak. Pagdating sa tulay papasok sa aming barrio ay may narinig daw syang splash sa ilog, pagtingin daw nya sa lola ay wala na ito at duon nya naisip na multo pala ang isinakay nya mula sa punong iyon. Sa sobrang gulat at takot ay iniwan na lamang nya ang bisikleta sa gitna ng tulay at kumaripas ng takbo pauwi sa bahay nila. Sa bandang dulo ng barrio p naman bahay nila.