Pinoy Horror Story

Sana po matulangan nyo ako dito at malinawan man lang. Ito ang aking kwento, nasa inyo na po kung maniniwala po kayo sa kwento ko.

Simulan po natin noong 8 yrs. old po ako, grade 2 po ako noon. Galing po ako sa isang broken family. 4 years old pa lang po ako naghiwalay na ang parents ko. Lumaki ako sa side ng tatay ko sa Iloilo City. Itago ko nalang po ang eksaktong lugar namin, clue ko nalang po ay Center ng Christmas Lights tuwing December. Noong 8 years old po ako, pag Sabado po noon ako lang mag-isa sa bahay kasi yung kuya ko nasa galaan po ( dalawa lng po pala kami ng kuya ko side ng taytay namin bali bahay po talaga namin to). Mga 5 pm na po yun ng hapon at nanood po ako ng TV namin, yung TV po kasi namin nasa tabi ng pinto papuntang kusina, noong mga oras po na yun may isang programa po akong pinapanood, as in focus na focus po ako noon, nong bigla pong my kamay humawak sa pinto ng kusina namin! Kamay po ng babae, nagulat ako noon kasi wala naman akong kasama nung time na yun. Noong sinubukan ko pong tingnan bigla kong nakita yung damit nya mahabang kulay puti. Nung time na yun bigla ko pong pinatay yung TV namin at lumabas ng bahay, nag-stay po ako sa bahay ng pinsan ko, malapit lang po samin hanggang sa umuwi po yung taytay ko at naikwento ko sa kanya. Ang sabi nya lang wag ko daw pansinin kasi hindi naman daw po yun nanakit.

Ang pangalawang kwento ko naman po noong Grade 5 na po ako noon, isang anino naman po na kalbo ang nakita ko, hindi lang pala ako nakakita pati ang kuya ko. Hapon din po yun going to 6 pm na po. Gumagawa po ako noon ng H.W ko nung biglang may nakita po akong isang anino na kalbo maliit at my isang buhok lang. Sa gitna lang ito ng ulo nya. So ako naman po nagulat kasi nga ako lang naman magisa bahay at tahimik lang po yung paligid. Oo nga po pala tahimik po samin at madami pong mga punong kahoy sa paligid. So ako naman kumaripas ng takbo palabas at inantay ulit yung tatay kong umuwi at nagsumbong. Same suggestion pa din yung sinabi nya, na huwag ko nalang daw pansinin.

Ito pangatlo kong kwento. 4th year na ako noon at kakauwi ko lang ng bahay. Pag bukas ko ng main door po namin may salamin na reflection sa mukha ni Papa Jesus parang sumasayaw at bilog po siya. Hindi naman po kalakihan yung salamin, mga 5 inches lang po. Yung pinto po pala namin pag bukas nyo po kasi my mga picture nila Mama Mary at Papa Jesus na nakasabit kaya kita nyo agad. Nagulat po ako kasi yung mukha ng salamin basag at bilog at mukhang luma na po sya pero reflection lang po yun. Noong time po kasi na yun ay hapon na bandang 5 pm na din po. Saka nagtataka po ako kasi wala naman pong araw at saka bakit nagkaroon ng reflection e hapon na. Nung napagtanto ko lahat syempre karipas ulit ako ng takbo kahit walang pang bihis galing from school.

Pag katapos po noon, nung umuwi yung tatay ko sabi nya sakin hayaan ko lang daw po kasi hindi naman daw nila ako ginagalaw at ang sabi pa ng matatanda may isang pamilya daw po sa likod ng bahay namin ang nakatira daw. Kumbaga bantay daw ito at kababata daw namin ito. Hindi lang po ito yung nakita ko. Nakakakita din po ako ng Doubleganger. Una po sa school 2nd year po ako at classmate ko po yun, pangalawa po tita ko. Ang resulta nagkakasakit po sila pero pag katapos nilang magkasakit saka ko po sinasabi. Sabi daw po nila open daw po yung third eye ko. Ako naman po hindi ko alam kung maniniwala ako kasi hanggang ngayun ayoko makakita ulit kung pwede lang. Nasa Manila na pala ako at nag tatrabaho.