Pinoy Horror Story

Nung umuwi kami sa Pinas, naimbitahan kaming mag-dinner sa isang family friend namin, tapos nagkakwentuhan dun sa bagong CR ng mga security guards sa subd.

Dati kasi, yung lot na yun ay tinayuan ng bahay bakasyunan ng isang richie rich family sa Las Piñas, year 70's pa. Malaunan hindi na ginagamit ng may-ari ang bahay. Napapaligiran ng punong balete at rubbertrees yung bahay. Sobra talaga ang lago ng mga puno dun. Naluma na yung bahay kaya giniba na at tinayuan ng pahingahan at seperate na CR ng security guards.

Dalawang sikyo ay night shift, yung isang sikyo naiwan sa front gate at yung isa ay nag-iikot sa loob ng subdivision. Habang rumuronda, napadaan ang isang sa mga guard dun sa cr at binuksan ang pinto saka nagwiwi.

Nung matapos ng magwiwi si sikyo, binuksan niya ang pinto. Nabuksan nga niya pero nakaawang lang at pilit niyang hinahatak ang pinto para bumukas ng tuluyan pero napansin niya na sa labas ng pinto ay may kamay na humahawak at pinipigilang bumukas pa ng husto ang pinto.

Sinigawan daw niya yung humahawak sa kabilang side sa pag-aakala niyang tao na nagbibiro sa kanya. Pero walang sumasagot sa kanya. Sinigawan ulit ng sikyo pero walang reaction at biglang sumara ulit yung pinto na hindi na niya mabuksan talaga. Kinalampog na yung pinto para may makarinig sa mga kalapit-bahay pero sino namang makakarinig sa kanya, yung mga bahay sa paligid ay mga kilometro ang layo sa cr.

Nung magwalkie-talkie na yung sikyo na nasa front gate, walang sumasagot. Nagworry na yung sikyo at hinanap ang kasamahan niya. Nagtawag pa siya ng ibang sikyo na nakaduty naman sa ibang gate at hinanap nila ang rumoronda, pero hindi na nila siya nakita ng gabing yun.

5:30 ng umaga, dumating na ang mga relyebo ng mga sikyo at yung karelyebo ng nawawalang sikyo ay nagpunta muna ng cr at dun nila natuklasan na yung nawawalang sikyo ay nandoon at nanginginig pa sa takot at di makapagsalita. Isinugod nila ito sa hospital at 1week ang itinagal ng sikyu na yun sa hospital pero di bumababa ang lagnat. Walang makitang sakit, kaya inilabas na nila saka pinatawas. Dun nakita ng magtatawas na may babaeng puti dun sa kinalabasan ng tawas. Gumaling si sikyo at naikwento nga yung karanasan niya.

Marami na ring homeowners na nagsasabing may nakikita silang kakaiba sa lugar na yun. Open space at 2,000 square meters ang laki ng lote, kaya ang mga bata malimit maglaro dun at malimit ding magkasakit. Kaya mula noon, wala ng tumutuntong sa lote na yun. Sa gabi, mistulang haunted forest na sa haba ng mga ugat na nakalambitin sa rubber trees at yung mga iba pang puno na sobrang lalago ng dahon ang lote. Nakakapagtaka lang, wala namang naglilinis ng lot na yun pero sa ilalim ng balete tree ay nakapalinis na mistulang may nagwawalis dun.

Yung subdivison pala'ng yun ay tapunan ng sinasalvage nuong 60's 70's. Dinevelop lang ng may-ari para maging subdivision.

Mga 3 kilometers ang layo ng bahay ni nanay ko sa lot na yun. Pero may punong-mangga ang nanay na sabi ng mga neighbors, may nakikita din sila na tao na nakatayo lagi sa may puno lalo na sa gabi..

Kaya nung umuwi kami last time, may dala akong tubig bendisyon at kaming lahat dinasalan namin ang buong kabahayan ng nanay at pati na yung garden niya at yung punong mangga. Nung nililibot namin ang garden, nagtataasan ang mga balahibo namin na parang may dumaang malamig na hangin.

Hindi ako mapagpaniwala sa ganito pero mismong ako ang nakaramdam.