Pinoy Horror Story

Ito po ay base sa aking karanasan ng ako ay 12 year old pa lamang, ngayon ay 18 year old na ako.

 

Natutulog ako ng mahimbing sa aking silid, ng magising ako ng 4:00 a.m. at na pansin ko na bukas ang aming ilaw sa kusina (MERON KASING MALIIT NA BINTANA SA AKING SILID NA KONEKTADO SA KUSINA). Sabay ng pagbukas ng ilaw, ay nakaranas din ako ng matinding uhaw. Akala ko kaya bukas ang ilaw ay nagising lamang ng maaga ang aming kasambahay upang maghain ng almusal. Pero dahil sa matinding uhaw nagdesisyon ako na magtungo sa aming kusina upang kumuha ng maiinom sa refrigerator. Doon ako nag simula magtaka, dahil walang tao sa kusina, pero ito ay binalewala ko na lamang.

 

Matapos akong uminom ng tubig pumunta ako sa may switch ng ilaw para i-off ito. Sa di ko inaasahan kusa itong namatay. Di naman ako na takot sa kadahilanang matagal na rin itong di napapalitan, naisip ko na lamang na pundido na ito.

 

Nagdesisyon ako na magtungo muli sa aking silid para ipagpatuloy ang aking tulog. Sa aking paglalakad papunta sa aking silid ay napadaan din ako sa aming living room, at kagimbal-gimbal ang aking nakita. Nakita ko ang isang anino na nakaupo sa upuan na kahoy na parang hugis tao, may mahaba siyang buhok at tila nakaharap ito sa akin at ako'y pinagmamasdan. Lalapitan ko na sana ito pero ako'y natakot at nangamba. Kumaripas ako ng takbo sa aking silid at agad-agad ni-lock ko ito. Hindi ako nakatulog ng gabing iyon, hinintay ko sumikat ang araw habang pinagmamasdan ko ang aking paligid.