Pinoy Horror Story
Nasa elementary pa lang ako noon, na may dumating na bagong kasambahay. Natatandaan ko ang pangalan nya ay Grace, 20 years old pa lang sya. Mabait, magalang, masayahin at pala ngiti sya kaya magaan agad ang loob namin sa kanya. Mahilig sya kumanta habang naglilinis ng bahay,masipag at may itsura sya, yung lang, d masyado marunong mag tagalog si ate Grace,
Siguro 3 buwan pa lang siya nakatira samin nang may nangyari kakaiba sa kanya, yung grace na kilala namin pala kanta, at masayahin biglang nag bago, naging matamlay, d na namin sya naririnig kumakanta, o tumatawa, o manood ng tv, lagi nasa terrace tumatambay, feeling namin may hinihintay lagi, dumating nasa point kinausap na sya ng lola ko if may bf ba sya or na home sick na. puro iling lang sagot ni ate Grace nun,
Mag isang linggo na ang lumipas, napapansin pa rin na tahimik si ate Grace, kahit sa pagkain wala na rin sya gana. lagi sya natutulog, iniisip nga ni lola baka daw buntis, pero alam namin wala sya bf.
Sumunod na week ganun pa rin, tahimik pa rin si ate grace, d na rin sya nag tatrabaho sa bahay, lagi na lang sya nakahiga. Kinausap na sya ni lola kung gusto na nya bumalik sa bayan nila papayagan naman sya, pero puro iling pa rin lang ang sagot nya.
Kinabukasan, aakyat ako sa room namin, may napansin ako kakaibang usok mula sa hagdan galing sa taas, bumababa yung usok, parang fog pero sa may hagdan lang meron at mejo makapal sya kasya sa fog, isa pa, d naman malamig ang panahon nun at hapon pa lang, isang step pa lang ako napansin ko may anino sa dulo ng hagdan, si ate Grace pala, nakatayo, at walang kakilos kilos, nakatingin lang sya sa akin, tinawag ko sya kasi nagulat din ako sa itsura nya, basang basa sya.. pero d nya ko pinansin, bagkus nakatayo lang sya dun na parang wala sa sarili.
Tinawag ko si lola, pag punta ni lola sa tabi ko, umalis na si ate Grace sa hagdan bumalik sa tulugan nya malapit sa terrace.. Umakyat kami ni lola, sabi ko dapat mag palit sya ng damit at basang basa nga sya pero d pa rin sya kumilos, nagtataka si lola kasi d pa naman daw bumababa si grace para mag laba o maligo, bakit basang basa sya, sabi ko baka yun banyo sa taas ang ginamit, pero matagal na wala gumagamit ng cr dun kasi nga d kaya umakyat ng tubig.
Pinilit ni lola ibangon si ate grace para mag palit ng damit, pero sobrang bigat nya na d sya kaya ni lola, so ginawa ko tinulungan ko si lola, dalawa na kami d pa rin namin sya kaya. Pinag tulungan na lang namin sya bihisan na nakahiga. Habang binibihisan namin sya, nagsasalita si ate Grace pero d namin maintindihan, d ko alam if bisaya ba yun para kasi kakaibang salita..
Buong araw nakahiga si ate Grace, wala naman lagnat, basta nanlalamig lang sya at parating basang basa sya. para sya nag buhos o naligo sa ulan sa basa nya.
Naririnig namin, umiiyak sya ng madaling araw, pero pag lalapit si lola tumitigil at pag tinatanong naman sya d sya sumasagot.
Kinaumagahan, nagulat kami kasi nasa sala si ate grace, dun sa sofa sya nakahiga, bigla na lang sya umupo ng nakita kami. Kinausap sya ni lola tinanong kung ok na pakiramdam nya, d nya sinagot si lola, tumayo sya at naglakad, pero laging gulat namin, kasi habang naglalakad sya, para syang kuba na, o parang matandang hirap na maglakad. Pumasok sya sa banyo tapos bumalik sa sofa ganun pa rin ang lakad nya, parang uugod ugod na.
Naisip na ni lola mag patawag ng albularyo o magtatawas, dahil kakaiba na nga kinikilos ni ate Grace.
Nang dumating ang albularyo, tinawas nya agad si ate Grace at nakita sa tawas yung hugis ng isang matandang kuba.. May pinahid sya na langis sa katawan ni ate Grace at pagkatapos tinusok sya ng palito sa dulo ng daliri, bigla sumigaw si ate, sigaw na nasasaktan, pero nakakapagtaka, diretsong tagalog ang salita nya at ibang boses nya, boses ng matandang babae, tinanong sya ng albularyo, bakit nya pinapahirapan si ate, sumagot si ate grace, habang nakapikit pero umiiyak at sumisigaw na wala daw respeto si ate Grace, binuhusan sya ng tubig, at nabasa daw sya.. Tinanong ng albularyo saan sya nabasa, tinuro ni ate Grace yun direction ng papunta sa dirty kitchen kung san si ate grace naglalaba sa madaling araw.
Humingi ng tawad ang albularyo sa ginawa ni ate Grace at nangako d na uulitin ni ate, d pumayag yung boses na lumalabas kay ate grace, isasama daw nya si grace sa lugar nya at gagawin alipin. tinusok uli ng palito ang mga daliri ni ate grace at muli sya nagsisigaw sa sakit, nagwawala at nanakot d nya iiwan ang katawan ni ate.
Naka ilan bahid pa uli ng langis, tusok ng palito at dasal saka tumahimik si ate Grace, bumangon siya at biglang naglakad. Ok na uli ang lakad nya, bumalik na sa dati. kinausap sya at tinanong ni lola, ngumiti lang sya, naglakad uli sya papunta sa dirty kitchen, pag balik nya nagulat kami bigla na lang sya tinapik ng albularyo, mahinang tapik lang sa balikat ang ginawa sa kanya at bigla na lang sya bumagsak.
Sabi ng albularyo, nag panggap lang daw yung matanda nasa katawan ni ate Grace, gusto nya lang umalis na yung albularyo. Akala namin bumalik na sa dati pero d pa pala. Muli nag dasal yung albularyo, this time pinasabay na rin nya kami, pagkatapos nun, bigla na lang dumilat at nagising si ate Grace, uhaw na uhaw, binigyan ni lola ng tubig, at tinanong kami anong nangyari sa kanya at bakit kami lahat nasa sala.
Akala nya nakatulog lang sya sofa, sabi ni ate Grace, sa panaginip nya, nasa isang kweba daw sya, nakahubad daw sya at takbo ng takbo, d daw nya alam saan at pano sya lalabas ng kweba, ginaw na ginaw daw sya dahil nakahubad nga sya at mausok yung paligid nya. D na nya alam gagawin, sumisigaw sya pero wala naman sumasagot sa kanya.. Kinuwento namin na halos mag 2 linggo na sya maysakit, d sya makapaniwala alam nya katapos lang nya maglaba at nakatulog sya after nya mag sampay.
kinabukasan pinasama na ni lola sa kamag anak nya si ate Grace para umuwi na sa bayan nila at dun na lang mag pag pahinga at saka para malayo na rin sa kung anuman elemento nagalit sa kanya. Bago umalis si ate Grace nakita ko pa sya umikot sa buong bahay namin, at tapos nagpaalam sa amin, masaya na sya uli, nag pasalamat sya samin, inakap ako ni ate Grace, pero iba pakiramdam ko, sobrang lamig ng katawan nya..
Habang naglalakad sila palayo ng bahay ng tyahin nya, nakita pa namin masaya at patalon talon pa kung maglakad si ate, pero nung pumasok na si lola sa bahay, naiwan pa rin ako sa labas at tinitignan ko si ate Grace, napansin ko habang papalayo sya, kumukuba na naman sya habang naglalakad, kinilabutan ako, pumasok na ako bahay, sinabi ko kay lola, kinabukasan, nag padala kami ng sulat sa tyahin ni ate Grace at sinabi ni lola na maghanap ng pwede pa rin tumingin kay ate Grace.
after a month, naka tanggap kami ng sulat galing sa kamag anak ni ate grace sa probinsya, namatay na daw si ate Grace, nakita na lang nila nakahiga, at basang basa buong katawan.
Joel 1989